Excelente fin de semana o vivido durante o transcurso dos Campionatos Xunta de Galicia Sub10-Sub12 e Sub14 que xuntaron nas instalacións cubertas de Expourense e Riazor a preto de 800 atletas achegados de todos os recunchos da nosa comunidade.
A tónica dominante de ambos foi o excelente ambente competitivo e a enorme motivación que amosaron os atletas en cada unha das probas e concursos nas que tomaron parte e que levaron consigo o rexistro de moi boas actuacións a nivel xeral.
Novamente traballo de dez, para as adestradoras e adestradores dos distintos clubs e entidades deportivas quenes estiveron durante todo o fin de semana acompañando e guiando as máis pequenas e pequenos do noso deporte.
A nivel de resultados destacamos as moi boas actuacións levadas a cabo a nivel xeral, en especial as rexistradas na categoría Sub14 por Iago Gómez da Gimnástica quen sobre os 60 valos realizaba unha marca de 8.73 e a de Andrés Álvarez do ADAS CUPA quen no concurso de altura saltaba ata os 1.14 m.
No tocante a categoría Sub12 Valeria Mera do Atletismo Narón na lonxitude alcanzaba os 4.56 m. e Sara Mourente da Gimnástica de Pontevedra na categoría Sub10 paraba o crono nos 50 m. en 8.02.