Se hai unha popular pedestre de referencia en Marineda, esa é A Coruña 10. E onte
deu un paso adiante. O da súa presentación oficial. Pero o atletismo popular coruñés, o que axudou a consolidar esta cita no calendario deportivo galego, leva días de vantaxe. Xa son dous mil os
atletas de todas as idades inscritos nunha das probas máis apreciadas polos afeccionados nos últimos anos.
A Coruña 10 viuse obrigada a ampliar o seu prazo de inscrición para atender á demanda suscitada. Así, os interesados en participar na proba popular pedestre coruñesa que se celebrará o domingo a
partir das once da mañá poden anotarse na páxina oficial de internet da Federación Galega de Atletismo www.atletismogalego.org. A cota de inscrición é de cinco euros para os propietarios de chip
amarelo e sete euros para os que non son propietarios do chip.
Chairo e sobre asfalto
A carreira terá saída e meta no Obelisco. O trazado, de dez quilómetros de lonxitude, transcorre sobre asfalto e é chairo, o que favorecerá as marcas se
o clima acompaña. A proba articúlase en sete categorías masculinas e femininas: júnior, promesa, sénior, veteranos 1, 2, 3 e 4, e terá 9.000 euros en premios.
Ao acto de presentación de onte asistiron o presidente da Federación Galega de Atletismo, Isidoro Hornillos; o concelleiro de Educación, Deportes e Mocidade, Francisco Mourelo; o director de
comunicación do Corte Inglés Galicia, Jose Manuel Branco; e por María Sande, relacións externas de Coca Cola.
Isidoro Hornillos explicaba onte que «esta proba ten un certo simbolismo, porque foi a primeira en dar comezo a unha resposta popular nun escenario propicio como a cidade da Coruña, que tivo no
pasado momentos brillantes como o mitin Teresa Herrera». «É unha carreira consolidada, a pesar de que en Galicia existe moitísima oferta e iso provocou unha fragmentación», engade. «O traballo
conxunto do tándem que forman Federación Galega e Concello da Coruña dá os seus froitos», abunda. Atletas da talla de Carlos Villamor, Alejandro Fernández e Esther Navarrete pensan o mesmo.
Noticia e foto : La Voz de Galicia de 02/09/2012
