Co mes de agosto xa botado a andar e logo da celebración dos principais campionatos de España, é momento de facer un adianto do que deu de si a tempada de aire libre 2026 para o atletismo galego, cando xa se disputaron as principais citas estatais das distintas categorías.

O balance non pode ser máis positivo. Entre os Campionatos de España individuais Sub14, Sub16, Sub18, Sub20, Sub23 e Absoluto, celebrados entre os meses de maio e xullo, o atletismo galego acadou un total de 55 medallas, confirmando o excelente momento que atravesa a nosa comunidade no panorama estatal.

Ademais dos metais, outro dato especialmente significativo é o elevado número de atletas que conseguiron situarse entre os oito primeiros clasificados, acadando a condición de finalistas. En total foron 87 finalistas, unha cifra que evidencia a amplitude da base competitiva galega e a regularidade dos seus representantes nas grandes competicións nacionais.

No reparto das medallas, o noso atletismo suma un total de 20 títulos de campioa e campión de España, aos que hai que engadir 18 medallas de prata e 17 de bronce, repartidas entre todas as categorías.

A categoría máis destacada foi a Sub20, que concentrou o maior número de éxitos ao lograr 16 medallas, confirmando o extraordinario nivel dunha xeración chamada a ser protagonista nos vindeiros anos. Moi preto situouse o Campionato de España Sub18, no que a representación galega obtivo 15 metais. Entre ambas as dúas categorías, Galicia conseguiu ademais clasificar para as finais a un total de 34 atletas, un indicador da enorme calidade e profundidade do seu relevo xeracional.

Tamén resultou especialmente relevante a actuación no recente Campionato de España Absoluto, a cita de maior nivel do calendario nacional. Nel, o atletismo galego conquistou oito medallas, das cales tres foron de ouro, reafirmando a presenza de Galicia entre as comunidades autónomas máis competitivas do atletismo español.

Consolidación dun gran futuro

Todos estes rexistros poñen de manifesto que a extraordinaria xeración de atletas que comezou a emerxer tras a “crise do ladrillo” e que continúa dando pasos firmes na súa consolidación deportiva. O traballo desenvolto durante anos polos adestradores e adestradoras, clubs, escolas deportivas e organismos públicos, está a traducirse nun relevo xeracional sólido, capaz de competir con garantías en todas as categorías e disciplinas.

Máis aló do número de medallas, o elevado volume de finalistas deixa entrever un amplo abano de deportistas con capacidade para seguir progresando nas próximas tempadas. A combinación de atletas xa consolidados coa continua aparición de novos talentos permite afrontar o futuro con optimismo, mantendo a Galicia entre as grandes referencias do atletismo estatal.

A tempada de aire libre aínda reserva algunhas competicións internacionais para varios atletas galegos, polo que este excelente balance podería verse incrementado nas próximas semanas. En calquera caso, os resultados acadados ata o momento converten o 2026 nun dos anos máis destacados do atletismo galego recente, tanto polo número de medallas como pola calidade dos seus resultados.

Foto, RFEA