Un total de 42 atletas galegos e galegas competirán esta fin de semana no Campionato de España Absoluto ao aire libre, a cita máis importante do calendario atlético estatal, que terá como escenario o Estadio Ciudad de Málaga. A expedición galega presenta unha ampla representación en practicamente todas as disciplinas, con deportistas que aspiran tanto á conquista de medallas como á consecución de marcas persoais nun momento clave da tempada.

Medio fondo con aspiracións ao máis alto

No medio fondo, unha das grandes referencias será o finalista olímpico Adrián Ben, que defenderá o título conquistado o pasado ano nos 1.500 metros. O atleta galego chega ademais coa mellor marca dos participantes, polo que parte como un dos grandes favoritos para revalidar a coroa e reafirmar o seu dominio nunha das probas máis prestixiosas do campionato.

Nos 800 metros, a atención estará posta en Pedro Osorio, da Sociedade Gimnástica de Pontevedra, quen, tras acreditar unha excelente marca de 1:45.30, sitúase entre os catro mellores inscritos e aspira a loitar polos postos de honra.

Pola súa banda, nos 5.000 metros, o naronés Adrián Díaz, recentemente regresado da súa etapa nos Estados Unidos, intentará situarse na pelexa polas posicións de privilexio nunha das carreiras máis esixentes do programa.

Os valos e os concursos, outra das fortalezas galegas

Nas probas de valos, Galicia contará coa presenza do internacional Gerson Vidal Izaguirre e do actual campión de España Sub23 David Vicente, dous atletas chamados a desempeñar un papel protagonista.

Nos 400 metros valos, Xabi Lures, da Gimnástica, buscará continuar coa súa progresión tras establecer recentemente un excelente rexistro de 51.32 m., marca que confirma o seu gran estado de forma.

Nos concursos de saltos tamén haberá importantes opcións. En lonxitude, Sergio Coello, da Gimnástica, tratará de mellorar os 7,85 metros conseguidos esta tempada, mentres que Olaia G. Becerril, do Super Amara BAT, afronta o campionato a tan só dous centímetros da súa mellor marca persoal, situada en 6,33 metros.

Peso, xavelina e lanzamentos con claras opcións de podio

Boa parte das expectativas de medalla estarán centradas nas probas de lanzamentos.

No peso, a gran referencia será a plusmarquista de España e olímpica Belén Toimil, dominadora da especialidade nos últimos anos que parte como a gran favorita para seguir sumando campionatos de España ao seu gran palmarés.

Na xavelina, todas as miradas estarán tamén postas en Yulenmis Aguilar, que continúa recuperando sensacións tras superar unha importante lesión e que afronta o campionato nunha progresiva volta ao seu mellor nivel.

Nesta mesma disciplina competirá Yiset Magali Jiménez, atleta colombiana con licenza galega no Sanysec Ourense, quen chega coa segunda mellor marca das participantes, aínda que sen opción ao podio por cuestión regulamentaria. Xunto a ela estará tamén a medallista de España Sub23 Paula Piñón.

No disco, o internacional ecuatoriano con ficha galega Juan José Caicedo parte coa segunda mellor marca da competición, aínda que tampouco poderá optar ás medallas.

En martelo, Blanca Pereira (Sanysec Ourense) presenta o terceiro mellor rexistro das inscritas, consolidando unha progresión que a converte nunha das candidatas aos postos de honra. Na competición masculina, Carlos Revuelta, da Gimnástica, buscará repetir presenza entre os finalistas, partindo coa quinta mellor marca dos inscritos.

Pola súa banda, a internacional Sub20 Aixa Corbacho aproveitará esta competición para seguir afinando a súa preparación antes do Campionato do Mundo Sub20 de Oregón, intentando superar a súa mellor marca persoal de 61,04 metros.

A marcha, unha das disciplinas con maior representación

A marcha volverá ser unha das modalidades con maior protagonismo para o atletismo galego. Na liña de saída estarán os medallistas internacionaiss Antía Chamosa e Dani Chamosa, aos que se unirá Aldara Meilán, do Atletismo Lucense.

Completa a representación galega Mar Chillón, do Celta Atletismo, que intentará culminar unha excelente tempada cun bo resultado no campionato absoluto.

Mocidade e talento nos saltos e nas combinadas

Nos 100 metros valos, Uxía Pereira chega nun magnífico momento de forma despois de establecer recentemente un novo récord de Galicia absoluto cun tempo de 13.58 segundos, polo que buscará seguir rebaixando o seu propio rexistro.

Na altura, a subcampioa de España Sub20 Iria Solera (Sanysec Ourense) afronta o campionato coa intención de superar a súa mellor marca persoal de 1,76 metros.

No salto con pértega, a súa compañeira de club Manuela Blanco intentará consolidarse por riba da barreira dos catro metros, mentres que nas probas combinadas competirán dúas das grandes promesas do atletismo galego: Lucía Sánchez del Valle, da Gimnástica, e Carlota Salgado, do Celta Atletismo, medallistas de prata e bronce, respectivamente, no último Campionato de España Sub20.

A Gimnástica tamén estará presente nas remudas

A representación galega completarase coa participación do equipo masculino da Sociedade Gimnástica de Pontevedra no relevo 4×400 metros, integrado, entre outros, polos galegos Alexis Miguéns, Sergio Rodríguez e Pedro Osorio, que intentarán situar ao conxunto pontevedrés entre os mellores equipos do campionato.

Coa presenza de atletas consolidados a nivel internacional, campións de España e unha nova xeración de deportistas en clara progresión, Galicia afronta un Campionato de España Absoluto no que volverá aspirar a un papel destacado tanto na loita polas medallas como na consecución de novas marcas persoais que permitan pechar da mellor maneira posible a tempada estival.

Resultados  e streaming

Foto, RFEA