Ourense volveu botarse ás rúas para vivir unha nova edición da XLVIII Carreira Popular do San Martiño, unha cita que, ano tras ano, consolídase como a proba máis importante do atletismo popular en Galicia e un auténtico aceno de identidade da cidade.

Máis de 6.500 corredores —desde atletas de elite ata familias e afeccionados— encheron as rúas nunha xornada marcada polo ambiente festivo e a emoción do deporte compartido. Máis que unha competición, a San Martiño é unha festa do atletismo popular, un reflexo do espírito participativo e acolledor de Ourense.

Triunfaron os favoritos

No plano deportivo, a atleta olímpica Ester Navarrete (Puma) asinou un triunfo contundente por terceira vez consecutiva na categoría absoluta feminina. Navarrete dominou a proba desde o inicio e cruzou a meta con máis dun minuto de vantaxe sobre a tamén olímpica Alice Finot, que nun axustado sprint final superaba a Eva Piñel, ambas do Celta Atletismo. Na categoría masculina, a vitoria foi para David de la Fuente (C.D. Pinarium), que repite triunfo tras o seu recente éxito na Pedestre de Santiago, confirmando o seu gran estado de forma. Completaron o podio Iván Puentes e Yago García, nunha carreira de moita emoción.

Cun gran graballo organizativo levado a cabo por parte do Concello de Ourense, a Carreira Popular do San Martiño volveu demostrar por que é o evento deportivo máis emblemático da cidade e un referente no calendario atlético galego.

Gañadores por categorías

• Absoluta. Esther Navarrete (Puma) e David de la Fuente (CD Pinarium)
• Senior. Alice Finot (Celta At.) e David de la Fuente (Pinarium)
• Sub23. Carla Guisande e Yago I. García (At. Pino)
• Sub20. Emma Méndez ( At. Lucense) e Sergio Quintas (CD La Purísima)
• Sub18. Sabela Castelo (Ourense At.) e Alejandro Santos (S.Gimnástica)
• Sub16. Usúe Bernárdez (IES As Lagoas) Martí Miguens (At. Obradoiro)
• Sub14. Daniela González (CD La Purísima) e Migel Diz (At. Ría de Foz)
• Sub12. Noa Salgado (Mª Auxiliadora) e Mauro García (CPR Luis Vives)
• Sub10. Maia Garrido (Mestre Vide) e Adrían Rodríguez (At. Obradoiro)
• Máster35. Esther Navarrete (Puma) e Emilio Pérez
• Master40. Begoña Domínguez (Ourense At.) e Alex Fernández
• Máster45. Ana Isabel Soutullo e Javier Paredes do Ourense Atletismo
• Máster50.Sonia Teijeiro (C.D La Purísima) e Federico Losada (C.D.Biosbardo)
• Máster55. Purificación Ánegas (C.do Miño) e José Nercellas (ADAS CUPA)
• Máster60. Esther Pedrosa (Dawako) e José Suárez (S.D.Compostela)
• Máster65.Celina Rodríguez (Moraña R.) e Arlindo Riveiro (Castrelos 20:30)
• Máster70. Mª Carmen Rodríguez (Viaqua) e Xosé Luis Otero (C.A.Santiago)
• Mellores Ourensáns: Itziar Manso (Ourense At.) e Alex Fernández

Resultados

Foto: La Región