Ames presentou o seu Campionato de España de 5K
O salón de plenos da Casa do Concello de Ames acolleu esta mañá a presentación do Campionato de España de 5K que se desenvolverá na mesma xornada xunto a XXIV Carreira pedestre popular do Concello de Ames, o vindeiro domingo 19 de outubro en Bertamiráns e na súa contorna.
Ao acto de presentación estiveron entre outros o alcalde do Concello Blas García, a Concelleira de Deportes Susana Señarís, e o Presidente da FGa Iván Sanmartín quen apuntaba que ” este ano, por primeira vez, Ames acolle un campionato de España de atletismo en ruta. Penso que é un paso máis para esta gran proba deportiva que, para min, ten o circuíto máis rápido de Galicia. Seguramente, o vindeiro domingo caerá algún que outro récord, non só no campionato de España, senón tamén na proba popular. Veremos marcas moi relevantes, de feito, hai atletas do campionato máster que están correndo a tres minutos o quilómetro, sendo marcas estratosféricas. Ademais, estase a apuntar moita xente doutras localidades de España, polo que de seguro que teremos unha proba moi interesante”.
O campionato que xuntará a preto de medio milleiro de participantes, contará ca participación dos atletas máis importantes desta modalidade a nivel estatal, quenes achegados de todas as Comunidades, loitarán por cadar un bo resultado a nivel de rexistros e postos.
Paralelamente a este importante campionato, celebrarase a Carreira Popular sobre as distancias de 5 e 10 quilómetros cuxas inscricións seguen abertas ata o vindeiro martes día 14 de outubro.