No día de hoxe tivo lugar a presentación do Campionato Xunta de Galicia de Campo a través de remudas mixtas que terá lugar o vindeiro día 12 do outubro no Concello de Ames.

Ao acto asistiron o alcalde do Concello de Ames Blas Gracía, o presidente da FGA Iván Sanmartín, a Concelleira de Deportes Susana Señarís, o presidente do Atletismo SAR Fernando Saínz, o reponsable do circuito e membro do Atletismo Ames, David García así como o Fernando Vales do atletismo Santiago, en representación de atletas.

O campionato que abre as grandes citas autonómicas de campo a través do noso deporte, disputarase o vindeiro día 12 de outubro sobre unha distancia de 6.000 m. localizada sobre o circuito de Aldea Nova (a carón das pistas municipais de tenis) a partir das 11.00 horas

Para este evento, agárdase a participación dun nutrido número de equipos que buscarán o primeiro campionato autonómico por conxuntos desta tempada e na que novamente o actual campión ADAS CUPA, será o rival a batir.

I Cros Concello de Ames

Xunto a este campionato tamén se levará acabo o I Cros Concello de Ames aberto para as categorías Sub10, Sub12, Sub14, Sub16 e Sub18 que darán comezo ás 11:40, unha vez remate a proba principal.

As inscricións, para esta primeira edición, serán de balde estando abertas ata o vindeiro mércores día 9 de outubro.

Circuito permanente

O Circuito de Aldea Nova debuta nesta edición como escenario de campo a través, converténdose no primero con categoría de permanente desta modalidade. Con esta medida, que ven impulsada polo Concello de Ames, ampliarase significativamente as posibilidades do sector na nosa comunidade de cara á disputa de campionatos e probas oficiais.