Excelentes campionatos indoor Sub16 os disputados esta pasada fin de semana en Expourense que nos deixaban un récord galego, 124 mellores marcas personais e un total de 29 mínimas de participación para o Campionato de España que se levará a cabo precisamente nestas mesmas instacións os vindeios días 15 e 16 de marzo.
Hai canteira de futuro
Bo nivel na proba dos 60 m. na que Mateo Refojo do Rías Baixas lograba o título autónomico cun crono de 7.28 en homes polos 7.81 de Sofía Paz da Atlética Barbanza en mulleres. Xunto aos campións estiveron en zona de podio Laura Ríos con 7.90 e Alma Bello con 8:00 así como Iván Ríos con 7.35 e de Lois Corral con 7.45.
Mauro Seguín do Marineda Atlético, destacaba na proba dos 300 m. na que se proclamaba campión atonómico cun rexistro de 37.55
Continuando cas distancias de fondo e de medio fondo, Hugo Zuloaga do Atletismo Sada lograba o triunfo na proba dos 600 m. cun crono de 1:24.52 por diante duns tamén destacados Alejandro Freire con 1:25.11 e Jun Sieira con 1:28.44. En mulleres cinco atletas por debaixo do 1:40 con triunfo final para a céltica Olivia Gutiérrez con 1:37.60
Unha das noticias do campionato foi o récord galego indoor realizado por Xoel Franco do C.S.C.R.Beade quen lograba na proba dos 1.000 m. un excelente rexistro de 2:33.02 o que representa un novo tope autonómico Sub16 que sitúa e este importante talento do medio fondo e fondo galego ademáis, ao fronte do ranking de España. Bos tamén foron os rexistros realizados por Ismael Rodríguez con 2:39.80 e por Adrián Paz con 2:43.08 todos eles con MMP. Na categoría feminina Sara Muñoz da Atlética Lucense, lograba o campionato nesta mesma distancia con 3:04.87 polos 9:07.56 que marcaba o tamén lucense, Enrique García sobre a distancia dos 3.000 m.
Bo nivel nos valos con dous atletas masculinos por debaixo dos nove segundos. Bruno Castro do Coruña Comarca lograba o campionato galego con 8.63 sendo a prata para Joel Santana con 8.78.
No apartado de concursos, Sara Faraldo do At. Sada vencía con autoridade sobre o listón de altura con 1.61 m. ao igual que Beltrán Rivas do Atletismo Deza con 1.87 m.
En triplo Alba Comesaña da Agrupación Viguesa con 11.09 m. quedaba a tan só un centímetro da mínina nacional á que si en cambio chegaba o campión galego Bruno Castro do Coruña Comarca con 13.04 m.
Por último, Sara Caamaño da Atlética Barbanza conseguía claramente o campionato no concurso de peso cun mellor lanzamento de 12.68 m. que a colocan ao fronte do ranking de España da súa categoría.